Халықаралық косплей байқауының гран-при жүлдесі – 3,6 миллион теңге, әлемдік кино жұлдыздары және танымал блогерлермен кездесулер, видео ойындар, манга, комикс және аниме әлемінің жаңа өнімдері – елордамыздағы EXPO халықаралық көрме орталығында III Халықаралық Comic Con Astana фестивалі өтті.
Комикстер, кинематография, видео ойындар, аниме және заманауи танымал мәдениеттің өзге де бағыттарына арналған Comic Con Astana фестивалі 25-28 шілде аралығында EXPO ХКО-да өтті.
Алдын ала мәліметтер бойынша, іс-шараға Қазақстан, Қырғызстан, Өзбекстан, Әзірбайжан, Беларусь, Украина, БАӘ, Қытай, Черногория, АҚШ, Канада, Ұлыбритания, Франция, Польша, Гүржістан, Чехия, Литва, Ресей, Армения, Эстония, Кипр, Оңтүстік Корея, Таиланд, Парагвай, Катар және т.б. да 30 елден 50 мыңнан астам адам қатысқан. Ұйымдастыру комитетінің мәліметінше, фестиваль қонақтары 4 күн ішінде 100 000-нан астам рет келген.
Бірінші күн қызықты кездесулермен басталды. Аниме, ойындар және фантастикалық фильмдердің жанкүйерлері өздерінің сүйікті кейіпкерлері, танымал дубляж актёрлері Егор Васильев пен Ислам Ганджаевтың дауыстарын естіді.
Ұлттық суперқаһарман «Капитан Байтасов» туралы қазақстандық фильмнің тұсаукесері өтті. Сценарий 2011 жылы Таразда лаңкесті ұстау кезінде гранатаны кеудесімен жауып, өз өмірін қиып, бейбіт тұрғындарды құтқарған полиция капитаны Ғазиз Байтасовтың шынайы оқиғасына негізделген.
Танымал блогер Ян Топлес Comic Con Astana жазылушыларымен кездесті. Жас қазақстандық JKS Entertainment командасы жанкүйерлерімен шығармашылық ізденістері мен лайфхактарымен бөлісті.
Comic Con Astana фестивалінің екінші күні қонақтар үшін танымал блогер, актёр және веб сериал авторы Антон Лапенкомен өткен кездесумен есте қалды.
Фестивальде жанкүйерлердің сұрақтарына «Ведьмак» дастанының басты кейіпкері Ривиялық Геральт және Cyberpunk 2077 ойынындағы Винсент (V) сынды екі кейіпкерді ұсынған германиялық косплейші Maul жауап берді.
The gifted және «Уэнсдэй» сериалдарындағы рөлімен танымал канадалық актёр Перси Хайнс Уайт жанкүйерлерімен Q&А форматында кездесу өткізді.
Comic Con Astana халықаралық фестивалінің үшінші күні де жұлдыздар мен жанкүйерлердің кездесулерімен ерекшеленді. Фестивальдің бас сахнасында атақты дубляж актёрлері Всеволод Кузнецов (Нео мен Геральт) пен Пётр Гланц (Дэдпулдың ресми дауысы) сұрақ-жауап сессиясын өткізді.
Сонымен қатар бұл күні YouTube-тегі Chuck Review арнасының жүргізушісі Даниил Лазаренков жанкүйерлердің сұрақтарына жауап берді. Сондай-ақ корей дорамаларын дыбыстайтын ерлі-зайыпты Принц Лимон мен Аконья жанкүйерлерімен кездесті.
Қазақстандық шығармашылық ұжымдардың жаңа фильмдері – жарықтан қорықпайтын заманауи қазақ қанішерлері туралы «Жезтырнақ» фильмінің, сондай-ақ «А-Студио» тобының әндеріне негізделген «Стоп, ночь!» киномюзиклінің тұсаукесері өтті.
Бірақ үшінші күннің нағыз жұлдызы – фестивальдің хедлайнерлерінің бірі, бүкіл әлемге «Ганнибал» сериалымен, сондай-ақ «Доктор Стренж», Rogue One: A Star Wars Story, Indiana Jones and the Dial of Destiny фильмдерімен танымал дат актёрі Мадс Миккельсен болды. Оның қолтаңба-сессиясы 3,5 сағатқа созылды, ол кешкі астан бас тартып, сағат 20:00-де сахнаға қайта шығып, тағы екі сағат қолтаңба беруді жалғастырды.
Comic Con Astana фестивалінің төртінші күні Мадс Миккельсенмен сұрақ-жауап сессиясын танымал қазақстандық режиссёр және клипмейкер Айсұлтан Сейітов жүргізді. Содан кейін «Ганнибал» сериалының жұлдызы баспасөз конференциясында әртүрлі елдерден келген журналистердің сұрақтарына жауап берді. Ол қазақстандық кинематографистермен жұмыс істеуге дайын екенін және елімізде тарихи тұлға – жаулаушы Атилла туралы фильм түсіргісі келетінін айтты.
Сонымен қатар «Слово пацана» сериалындағы Марат рөлімен танымал ресейлік театр және кино актёрі Рузиль Минекаев жанкүйерлерімен кездесу өткізді.
Жүлде қоры 12 000 000 теңге дәстүрлі халықаралық косплей байқауы фестиваль шоу-бағдарламасының басты элементі болды.
Оған қатысуға Қазақстан, Қырғызстан, Өзбекстан, Әзірбайжан, Беларусь, Ресей, БАӘ, Қытай, Гүржістан, Черногория, Ұлыбритания, Армения, Кипр және Таиланд сияқты 14 елдің 140 косплейшісі өтінім білдірді.
Қазылар алқасының құрамында Даниядан келген дарынды косплейші және костюм шебері Trine, Геральттің германиялық танымал косплейшісі Maul, сонымен қатар салада 8 жылдық тәжірибесі бар косплейші, Comic Con Astana 2023 косплей байқауының жеңімпазы Keller болды.
Іріктеу кезеңдері күн сайын өтті. Косплей байқауының финалына 51 қатысушы шықты.
3,6 миллион теңге көлеміндегі бас жүлде Ресейден келген Cosband Siberia командасына бұйырды. Олар Smite видеойынындағы Valkyrie’s Rage Thanatos және Ares-ті көрсетті.
Бірінші орын мен 1 миллион 700 мың теңге жүлдесін Baldur’s Gate 3 ойынындағы Shadowheart (Dark Justiciar armor) кейіпкерін ұсынған ресейлік косплейші Frau_Haku иеленді.
Екінші орын мен 1 миллион 100 мың теңге жүлдесін Sakizo Illustrator авторының Clown Doll қуыршағын көрсеткен қырғызстандық косплейші Ran Hime иеленді.
Үшінші орынға Baldur’s Gate 3 ойынындағы Karlach бейнесін сомдаған Ресейден келген косплейші Sazura иеленді. Ол 800 мың теңге алды.
Сондай-ақ байқауға қатысушылар 12 қосымша номинация бойынша марапаттарға және Freedom Bank арнайы серіктес номинациясына ие болды. Жүлде қоры 200-нан 600 мың теңге аралығында болды.
