15 маусымда EXPO іскерлік кешенінің аумағында жазғы концерттер маусымы басталады. Маусымды халық және заманауи шығармаларды орындайтын «Тарлан» этноансамблінің, вокалдық-аспаптық топтың және әртістердің қатысуымен өтетін этнофестиваль ашады.
Жылда жазда маусым мен қыркүйек аралығында EXPO аумағындағы жазғы сахна әр демалыс сайын жұмыс істей бастайды. Дәл осы жерде былтыр Дастан Оразбеков, Құрмаш Маханов, Маржан Арапбаева, Айқын, DJ Imanbek және басқа да әртістердің 13 open air концерттері өтті. Сондай-ақ The Spirit of Astana халықаралық заманауи этникалық музыка фестивалі, Шәмші Қалдаяқов әндерінің фестивалі, рок-фестиваль және басқа да мәдени-ойын-сауық іс-шаралары өткізілді.
Апта сайын сенбі күндері жазғы сахнада 101 тобы, Қайрат Баекенов, Маржан Арапбаева, Мирас Жүгінісов және басқа да ұжымдар мен әртістердің концерттері өтетіні туралы хабарлаймыз. Концерттерге кіру тегін. Іс-шаралардың басталуы сағат 19:00-де.
Сонымен қатар EXPO кешенінің аумағында ролик тебуге арналған жаңа роллердром ашылды. Роллердромның жұмыс уақыты жұмыс күндері сағат 14:00-ден 23:00-ге дейін, ал демалыс күндері сағат 10:00-ден 23:00-ге дейін. Роликтерді жалға алу құны – 2000 теңге, ал өз ролигімен кіру тегін. Сондай-ақ жасөспірімдер мен ерекше қажеттіліктері бар балалар үшін бейімделген бірегей ойын алаңы орналасқан саябақ аймағында серуендеуге де болады.
Бұдан бөлек аумақта Болашақ энергиясы мұражайы жұмыс істейді, ол сейсенбіден жұмаға дейін сағат 10:00-ден 20:00-ге дейін, демалыс күндері сағат 10:00-ден 21:00-ге дейін жұмыс істейді, дүйсенбі – техникалық күн.
Сондай-ақ осы демалыс күндері аумақта сағат 12:00-ден бастап Garage Fest жәрмеңкесі өтеді, оған 50 кәсіпкер мен қолөнерші қатысады. Жәрмеңкеде ұлттық әшекейлер, декор элементтері, эко сөмкелер, қолдан жасалған майшамдар, ойыншықтар және т.б. болады.
Garage Fest жәрмеңкесі – бұл жас кәсіпкерлерді, зейнеткерлерді, мүмкіндігі шектеулі жандарды қолдауға арналған әлеуметтік жоба. Жоба оларға қосымша табыс табуға мүмкіндік береді.
«QazExpoCongress» ұлттық компаниясы әрдайым әлеуметтік жобаларға, сондай-ақ қала тұрғындары мен қонақтарының EXPO іскерлік кешенінің аумағында жайлы әрі қызықты уақыт өткізуіне аса көңіл бөледі.
