Кипр Президенті еліміздегі жасанды интеллект пен цифрландыруды дамытудың негізгі бағыттарымен танысты. Делегацияға таланттарды даярлаудан бастап экономиканың түрлі салаларына озық шешімдерді енгізуге дейінгі жасанды интеллект экожүйесін дамытудың толық циклін қамтамасыз ететін жаңа alem.ai халықаралық орталығының мүмкіндіктері таныстырылды.
Қонақтардың ерекше қызығушылығын Астана қаласының әкімдігімен бірлесіп Presight компаниясы жүзеге асырып жатқан қалалық инфрақұрылымды басқаруға арналған кешенді AI-платформа — Astana Smart City жүйесі тудырды. Делегацияға қоғамдық қауіпсіздікті қамтамасыз ету, көлік ағындарын басқару және қалалық сервистердің тиімділігін арттыру бағыттарында жасанды интеллектті қолданудың практикалық шешімдері көрсетілді.
Бүгінде alem.ai IT-таланттарды, инновациялық жобалар мен шетелдік серіктестерді тартатын халықаралық орталық ретіндегі мәртебесін нығайтып, Қазақстанның цифрлық жетістіктерін таныстыратын негізгі алаңдардың біріне айналып келеді.
