«QazExpoCongress» ұлттық компаниясы 5-9 тамыз аралығында ақын-ағартушы, жазба қазақ әдебиетінің, қазақ әдеби тілінің негізін қалаушы, философ, композитор, аудармашы, саяси қайраткер Абай Құнанбаевтың туған күніне арналған Абай апталығын өткізді. Апта бойы қызметкерлер ұлы ақын-ағартушының өмірбаянымен және шығармашылығымен танысты.
Апта соңында Қазақстан Республикасы Ғылым және жоғары білім министрлігі Тіл саясаты басқармасының басшысы Қайыржан Рахымжановтың қатысуымен компания қызметкерлері арасында «Ұлы халықтың – Ұлы Абайы» атты байқауы өтті.
Тақырыптық апта ұлы ақын мұрасын дәріптеу арқылы мемлекеттік тілді қолдануды кеңейтуге және оның мәртебесін арттыруға, компания қызметкерлері арасында қазақ халқының әдеби мұрасын ілгерілетуге бағытталды.
Конкурсты ашу кезінде Басқарма төрағасының орынбасары Алмас Рахимберлин құттықтай отырып, осындай іс-шаралардың классикалық қазақ әдебиетіне деген қызығушылықты арттыру және Абай шығармаларына тән эстетикалық құндылықтарды дәріптеудегі маңыздылығын атап өтті. Мұндай бастамалардың Компанияның мәдени дамуы мен рухани байытылуына ықпал ететініне сенім білдіріп, барлық қатысушыларға табыс пен сәттілік тіледі.
Байқау төрт номинация бойынша өтті:
1) «Өлең – сөздің патшасы, сөз сарасы» – Абай өлеңдерін үздік орындау байқауы;
2) «Абайдың қара сөздері» – Абайдың Қара сөздерін мәнерлеп оқу;
3) «Көңілім әнді ұғады» – Абай мен Шәкәрімнің әндері мен күйлерін орындау шеберлігін бағалау;
4) «Жүйріктен жүйрік озар жарасқанда» – Абайдың өмірі мен шығармашылығы туралы викторина.
Байқау аясында компания қызметкерлері арасында «Ақылбай», «Мағауия» және «Кәкітай» атты үш топ құрылды. Байқау барысында қатысушылар өздерінің орындаушылық шеберліктерін, Абай шығармаларын түсінудің тереңдігін көрсете отырып, нағыз әдеби сайыстың атмосферасын құруға мүмкіндік берді.
Байқау қорытындысы бойынша барлық қатысушылар «QazExpoCongress» ҰК» АҚ Басқарма төрағасының арнайы дипломдарымен және алғыс хаттарымен марапатталды, сондай-ақ естелік кәдесыйлар алды.
Іс-шара соңында ҚР ҒЖБМ Басқарма басшысы Қ.Рахымжанов конкурстың ұйымдастырушылары мен қатысушыларына алғысын білдіріп, қазақ тілін насихаттауға бағытталған осындай іс-шараларды өткізу ұлттық мәдениетті сақтаудың негізгі факторы болып табылатынын атап өтті.
