Бүгін – ұлттық киім күні. Наурызнамада белгіленген атаулы күнге орай, «QazExpoCongress» ұлттық компаниясында ерекше жоба басталды. Ежелден ырыс пен берекенің арқауы болған көктем мезгілінің ұлы мерекесі – Наурыз мейрамы қарсаңында ұлттық киімімізді ұлықтау мақсатында, 15 наурыз бен 15 сәуір аралығында компанияда «Ұлттық киім айлығы» болып бекітілді. Бұл жоба ұлттық мәдениетті сақтау мен ілгерілетуге, сондай-ақ қазақ ұлттық киімінің ерекшелігін көрсетуге арналады.
Жобаны барлық қызметкерлеріміз бірауыздан қолдап, қазақы киімнің сән-салтанатын дәріптеу үшін жұмысқа қазақтың ұлттық киімін (камзол, желетке, кәзекей, тақия, шапан және т.б.) киіп, әшекей бұйымдарды, ұлттық киім элементтерін және т.б. тағып келді.
Кез келген халықтың ерекшелігін және болмысын білдіретін негізгі көрсеткіштердің бірі – ұлттық киімі. Қазақтың ұлттық киімі – ежелден осы күнге дейін сақталып келген ұрпақтар дәстүрі мен өнерінің айқын белгісіне айналды. Сонымен бірге, ұлттық киіміміз – көшпелі халық өмірінің барлық аспектілерін, сондай-ақ этикалық ұстанымын, өмір салты мен кәсібін көрсетеді.
Ұлттық киім күнін насихаттау мақсатында бұл жобаны жыл сайын дәстүрлі түрде өткізу жоспарда бар.
