Бүгін Астана қаласында сағат 12:00-де Балалар жылы аясында EXPO халықаралық көрме орталығының алаңында 17-21 тамыз аралығында өтетін «KIDS EXPO. Балалар әлемі» балалар тауарларының бірінші қалалық жәрмеңке-көрмесі басталды. Іс-шараны ұйымдастырушы Астана қаласы әкімдігінің қолдауымен «QazExpoCongress» ұлттық компаниясы» акционерлік қоғамы.
Жәрмеңке тақырыбы: білім беру, хобби, демалыс, балалар мәдениеті (журналдар, кітаптар және музыка), ойындар әлемі (ойыншықтар, ойындар және қолдан жасалған бұйымдар), балалар сәні мен киімдері, керек-жарақтар мен аксессуарлар және басқа да бағыттар.
«KIDS EXPO. Балалар әлемі» балалар тауарлары мен қызметтерінің астаналық жәрмеңкесі – елорда тұрғындары мен қонақтары жаңа оқу жылына қажеттінің бәрін сатып ала алатын тауарлар мен қызметтер нарығының көшбасшыларын біріктіретін бірегей алаң.
Бес күн бойы мұнда кітап, кеңсе, тоқыма, білім беру, ойын-сауық индустриясының 100-ге жуық қатысушысы өз тауарларын ұсынады.
Жәрмеңке барысында келушілер үшін арнайы ақпараттық, мәдени және спорттық бағдарламалар ұйымдастырылады, оған қазақстандық және халықаралық сарапшылар қатысады, сондай-ақ білім беру мекемелерінің педагог-психологтары үшін панельдік сессиялар, кітаптардың, оқыту әдістерінің, мектептердің тұсаукесерлері, сондай-ақ оқыту тренингтері мен шеберлік кластары, байқаулар, балалар мен мектеп киімдерінің көрсетілімдері өткізіледі.
Балалар мен мектеп тауарлары және қызметтері индустриясын қолдау, сондай-ақ дамыту мақсатында жәрмеңкені жыл сайын өткізу жоспарланғанын атап өткен жөн.
