2025 жылғы 24 сәуір күні QazExpoCongress ұлттық компаниясының ғимаратында мемлекеттік тілдің цифрландыруы мен насихатталуына арналған кездесу өтті. Кездесуге «Тіл Қазына» ұлттық ғылыми-тәжірибелік орталығының жетекші мамандары қатысты.
Осы кездесуде орталықтың өкілдері заманауи технологиялар жағдайында мемлекеттік тілді дамытуға және қолдауға бағытталған бірқатар инновациялық жобаларды таныстырды. Аудиторияның ерекше қызығушылығын орфография мен грамматиканы тексеруге арналған жасанды интеллект негізіндегі «Qazgramma» интеллектуалды жүйесі тудырды.
Сонымен қатар, қазақ тілін оқыту мен үйретудің жаңа тәсілдерін ашатын «Tilqazyna» және KazLLM модельдері таныстырылды.
QazExpoCongress қызметкерлері «Тіл Қазына» орталығының жұмыстарын жоғары бағалап, осындай бастамалар мемлекеттік тілдің әрі қарай дамуына және рөлінің нығаюына зор үлес қосатынын сөз етті.
Ұлттық компания дәстүрлі түрде қоғамдық, экологиялық және білім беру бастамаларын қолдайды. Өткен аптада қызметкерлер QAZTEST электрондық жүйесі арқылы қазақ тілін меңгеру деңгейін анықтайтын онлайн-тестілеуден сәтті өтті, ал алдағы сенбіде олар қала бойынша сенбілікке қатысып, қоғам мен қоршаған ортаны дамытуға өз үлестерін көрсетуді жоспарлап отыр.
АО «НК «QazExpoCongress»
